राजविराज । सर्वोच्च अदालतका प्रधानन्यायाधीश प्रकाशमान सिंह राउतले अदालतन जलाउनेलाई उन्मुक्ति दिन नहुने बताएका छन् ।
जेनजी आन्दोलनका क्रममा अदालतमा भएको क्षति अवलोकनका लागि सप्तरी आएका राउतले यस्तो बताएका हुन् ।
‘अदालतको सम्पत्ति जलाउनेले उन्मुक्ति पाउनुपर्छ भन्ने कुरा मान्य हुन सक्दैन्’ उनले भने, ‘यसको त अनुसन्धान हुनैपर्छ ।’
उनले अदालत भनेको जनताको सम्पत्ति भएको बताए । ‘यो जनताको सम्पत्ति हो । नष्ट हुँदा, आगजनी हुँदा, तलमाथि हुँदा अनुसन्धान हुनुपर्छ’ उनले भने ।
उनले अनुसन्धानका निम्ति अदालतहरुले प्रहरीमा जाहेरी दिइसकेको पनि बताए ।
जेनजी आन्दोलनका क्रममा देशभरिका अदालतहरुमा भएको आगलागीबाट अढाई अर्ब रुपैयाँ बराबरको क्षति भएको उनले जानकारी दिए । ‘यो २०७४/७५ तिरको मूल्य अनुसारको हो’ उनले भने, ‘अहिलेको मूल्यलाई हेर्ने हो भने त्योभन्दा बढीको क्षति भएको छ ।’
राउतले मुद्दाको फैसला दिन समस्या नहुने बताए । सर्वोच्चसहित देशभरिका अदालतमा जलेका मिसिलहरु खडा भइरहेको भन्दै फैसला दिन समस्या नहुने बताए ।
उच्च बार एशोसिएशन, राजविराजले आयोजना गरेको स्वागत कार्यक्रममा समेत सहभागी भएका राउतले देबानी प्रकृतिका मुद्दाहरुको कुनै कागज नभेटाइए मिलापत्रको प्रयत्न गर्न सुझाव दिए ।
कानुन व्यवसायीलाई आग्रह गर्दै उनले भने, ‘कागजात भेटाइएन, मिसिल खडा हुन सकेन भने यस्तो मुद्दामा यहाँहरुको योगदान अपरिहार्य छ । यस्तो मुद्दामा मिलापत्रको प्रयत्न गरिदिँदा मिसिल नहुँदा पनि वैधानिकता पाउँछ ।’
