राजविराज । जर्वजस्ती करणीबाट १३ बर्षकै उमेरमा बच्चा जन्माएकी एक बालिकालाई इन्सेकद्वारा सहयोग प्रदान गरिएको छ ।
जिल्लाको अग्निसाइर कृष्णसवरन गाउँपालिकाकी ती बालिकालाई इन्सेकले रु १० हजार सहयोग उपलब्ध गराएको हो । बिहीबार इन्सेक प्रतिनिधी नवीन कुमार यादवले उक्त रकम हस्तान्तरण गरे । त्यस अवसरमा वडा अध्यक्ष अशोक कुमार आचार्य, नेपाल पत्रकार महासंघ, सप्तरीका सह सचिव डम्बर राई, प्रहरी एवं स्थानीयहरुको समेत उपस्थिति थियो ।
पीडित बालिकाको स्वास्थ्य, पालनपोषण र कानुनी सहयोगका निम्ति थोरै सहयोग गरिएको इन्सेकले जनाएको छ । इन्सेक मधेश प्रदेशले निरन्तर सहयोग गरिरहने बताएको छ ।
गाउँकै एक युवकले जर्वजस्ती करणी गर्दा ती बालिका गर्भवती भएकी थिइन् । उनले गत १९ भदौमा छोरा जन्माएकी छन् । १० फागुन २०८१ मा बालिकासँग जर्वजस्ती करणी गर्ने अनिल कुमार महतो हालसम्म फरार रहेको इलाका प्रहरी कार्यालय कंचनपुरले जनाएको छ ।
घट्ना सार्वजनिक भएपछि पीडित परिवारले इलाका प्रहरी कार्यालयमा गत १३ असारमा उजुरी दिएका छन् । आरोपीको खोजी भइरहेको प्रहरीले जनाएको छ ।
पीडित बालिका अहिले आफ्ना आमाबुवाको संरक्षणमा छिन् ।
