राजविराज । सप्तरीको अग्नीसाइर कृष्णासवरन गाउँपालिकाका अध्यक्ष दिनानाथ चाैधरीले मागेको अन्तरिम आदेश दिन अदालतले अस्वीकार गरेको छ ।
राजीनामा दिएपछि अध्यक्ष चौधरीले राजीनामा नदिएको बताएका छन् । र, उनले उच्च अदालत राजविराजमा रिट दायर गरेका थिए ।
उच्च अदालतले सोमबार दुबै पक्षलाई छलफलमा बोलाएको थियो ।
अध्यक्ष चौधरीले परमादेशको आदेश जारी गरी पाउँ, साथै म निवेदकलाई गाउँपालिकाको अध्यक्ष भई कामकाज गर्न नरोक्नु नरोकाउनु अवरोध नगर्नु भनी विपक्षीहरुको नाउँमा तथा आफुलाई कार्यवाहक अध्यक्ष जनाई गाउँपालिकाको कुनै पनि कार्यक्रम संचालन नगर्नु नगराउनु भनी विपक्षी गाउँपालिकाको उपाध्यक्ष कल्पना कुमारी चौधरीको नाउँमा अन्तरिम आदेश गरी पाउँ भन्ने माग गरेका थिए ।
‘उल्लेखित उत्प्रेषण परमादेशको आदेश माग गरी अन्तरिम आदेश समेत जारी गरी पाउँ भन्ने निवेदन मागको विषयवस्तु हेर्दा, प्रस्तुत निवेदनपत्रमा उठाईएका नेपालको संविधानको धारा २१५ को उपधारा (८) मा भएको गाउँपालिकाको अध्यक्ष रिक्त हुने विषय समेतको संवैधानिक एवं कानूनी प्रत्र, रिट निवेदन साथ संलग्न प्रमाण कागजातहरु, छलफलको क्रममा विपक्षीहरुबाट पेश. भएका कागजातहरु तथा पछि पेश हुने लिखित जवाफ समेतको मुल्याङ्कन विवेचना गरी प्रस्तुत रिट निवेदनको अन्तिम सुनुवाई हुँदा सम्बोधन तथा निरुपण हुनुपर्ने प्रकृतिको रहेको देखिएको साथै निवेदकले परमादेशको आदेश समेत माग गरेको देखिंदा सो सम्बन्धमा पछी हुने निर्णय प्रभावित हुने गरी सुविधा तथा सन्तुलनको दृष्टिकोणसमेतबाट हाल निवेदन माग बमोजिम अन्तरिम आदेश जारी गरिरहनु परेन । नियमानुसार गर्नु’ अदालतको आदेशमा भनिएको छ ।
अचुतम कुमार आचार्यको इजलासले यस्तो आदेश दिएको हो ।
