राजविराज । सप्तरीमा नयाँ प्रमुख जिल्ला अधिकारी (सीडीओ) को रुपमा आएका नुरहरी खतिवडाले आफू कसैको दवाव र प्रलोभनमा नपरी काम गर्ने बताएका छन् ।
शुक्रबार जिल्लास्थित संघ–संस्थाका प्रतिनिधीसँगको छलफल कार्यक्रममा खतिवडाले उक्त कुरा बताएका हुन् । छलफलमा उठेका समस्या र जिज्ञासाबारे बोल्दै उनले भने, ‘हामीबाट गलत अपेक्षा नगर्दा हुन्छ ।’
प्रमुख जिल्ला अधिकारी खतिवडाले बिकृती बिसंगति, तस्करी सहय हुन नसक्ने बताए । राती १०, ११ बजे म आफै पनि हिड्ने र गलत काम गर्न चाहनेलाई सुत्न नदिने बताए ।
कानुन बिपरित काम गर्ने जोसुकै भएपनि कार्वाहीको दायरामा ल्याउने भन्दै उनले संविधान, ऐन, कानुन विपरीत काम गर्नेबिरुद्ध कठोर रुपमा प्रस्तुत हुने बताए । ‘मुखले बोल्दिनँ काम पनि यसै अनुसार अगाडि बढाउँछौ’ उनले भने ।
उनले जिम्मेवारी पूरा नगर्ने कर्मचारीलाई कार्वाही गरिने पनि बताए । सरकारको उदेश्य पूरा गर्नकै निम्ति आफूहरु काम गरिरहेको बताउँदै यो उद्देश्य पूरा नगर्ने कर्मचारीलाई कार्वाही गरिने बताए । उनले पालिकाहरुमा पनि गएर स्थानीयको समस्या बुझ्ने र समाधान गर्ने बताए । आफूहरुबाट कुनै गल्ती त्रुटि भए सच्याएर अगाडि बढ्ने उनले बताए ।
कार्यक्रममा सप्तरी उद्योग बाणिज्य संघका अध्यक्ष लालबाबु अग्रबाल, नेपाल पत्रकार महासंघका अध्यक्ष श्रवण कुमार देव, गैर सरकारी संस्था महासंघका अध्यक्ष बलदेव मण्डल, सेभ द सप्तरीका अध्यक्ष ध्रुब देव, कोशी पीडित समाजका निर्देशक देबनारायण यादवसहितकाले जिल्लामा देखिएका बिभिन्न समस्याको बारेमा अवगत गराएका थिए ।
