राजविराज । सप्तरीमा बिना अनुमति संचालन गर्दै आएको दुई वटा थप विद्यालयको माथिल्लो कक्षा बन्द गराइएको छ ।
जिल्लाको दुई पालिकाका दुई विद्यालयले बिना अनुमतिको संचालन गर्दै आएको माथिल्लो कक्षा बन्द गराइएको हो ।
सदरमुकाम राजविराज नगरपालिका ६ स्थित लिलजा इन्टरनेशनल बोर्डिङ स्कुल र बिश्नुपुर गाउँपालिका ६ स्थित नेपाल लायन्स पब्लिक स्कुलमा बिना अनुमति कक्षा संचालन गर्दै आएको थियो ।
शिक्षा समन्वय इकाईका शाखा अधिकृत कमलनाथ यादवले कक्षा ५ को अनुमति लिएर लिलजा स्कुलले कक्षा ८ सम्म र नेपाल लायन्सले बालबिकास केन्द्रको अनुमति लिएर कक्षा ५ सम्म संचालन गर्दै आएको थियो ।
उच्च अदालत जनकपुर, राजविराज इजलासले १९ बैशाखमा अनुमति पाएको भन्दा माथिल्लो कक्षामा भर्ना नगर्न अन्तरिम आदेश दिएपछि बन्द गराउनुपरेको उनले बताए ।
अदालतको यस्तो आदेश आएपछि हामीले बन्द गराउन पत्राचार गरेपनि नमान्दा बन्द गराएको उनले बताए ।
आगामी दिनमा अनुमति पाएको भन्दा बढी कक्षा संचालन गरे शिक्षा एन अनुसार कार्वाहीको भागिदार बन्ने भन्दै ती विद्यालय संचालकले सहीछाप समेत गरेको यादवले बताए ।
जिल्ला शिक्षा समन्वय इकाईको अगुवाइमा जिल्ला प्रशासन कार्यालयका प्रशासकीय अधिकृत जितेन्द्र पासवान, बिष्णुपुर गाउँपालिकाका शिक्षा शाखा प्रमुख रामेन्द्रनाथ यादवको टोलीले संचालन भएको माथिल्लो कक्षा बन्द गराइएको हो ।
शिक्षा समन्वय सप्तरीका प्रमुख शशी यादवले अनुमति नपाएर पनि संचालन हुँदै आएको विद्यालयलाई बन्द गर्न आग्रह गरिसकिएको र बन्द नगरेको पाइए बन्द गराउँदै शिक्षा ऐन अनुसार कार्वाहीको दायरामा ल्याइने बताए ।
यसअघि शुक्रबार हनुमाननगर कंकालिनी नगरपालिकास्थित अनुमति नलिई माथिल्लो कक्षा संचालन गर्दै आएका दुई विद्यालयको कक्षा बन्द गराइएको थियो ।
नगरपालिकाको वडा नम्बर ५ स्थित आनन्द निजी शैक्षिक गुठी र वडा नम्बर ७ स्थित आरपी मेमोरियल स्कुल बन्द गराइएको छ ।
यी दुबै विद्यालयले कक्षा १ को अनुमति लिएर ८ सम्म संचालन गर्दै आएको पाइएको थियो ।
अनुमति लिएका बाहेकको कक्षा संचालनमा रोक लगाइएको शिक्षा समन्वय प्रमुख यादवले जानकारी दिए ।
