राजविराज । अन्तर्राष्ट्रिय देव महासम्मेलनको तयारी तीब्र गरिएको छ ।
आगामी असोज १७, १८ र १९ गते राजविराजमा यो महासम्मेलनको आयोजना गरिनेछ ।
महासम्मेलनलाई सफल बनाउन शनिबार देव समुदायबाट राजनीतिक दलका नेता, संचारकर्मी, अधिवक्तासहित बौद्धिक पक्षसङ छलफल गरिएको छ ।
वागेश्वरी सेवा समितिको सभाहलमा आयोजित छलफल कार्यक्रमका बक्ताहरुले स्वजातीयको संस्कृति जगेर्नाको सवालमा महत्त्वपूर्ण हुने बताए ।
उनीहरूले समुदायभित्रको विकृती, विसंगतिलाई हटाउन पनि महासम्मेलनमा बहस गर्न, जातीय उत्थानका विषयवस्तु पनि ल्याउन सुझाव दिए ।
कार्यक्रममा राजनीतिक अगुवा जितेन्द्रनारायण देवले पहिचान स्थापित गराउन महासम्मेलन फलदायी हुने विश्वास गरे ।
उनले महासम्मेलनले एकता, सहयोग र सद्भावलाई बढावा दिन मद्दत गर्ने पनि बताए ।
महासम्मेलनबाट देव जातिको नाममा कृयाशिल सस्थाहरुको महासंघ बनाउन पनि उनले सुझाव दिए ।
नेकपा एसका जिल्ला अध्यक्ष प्रतापनारायण चौधरीले पछिल्लो समयमा विकृती, विसंगति बढेको भन्दै महासम्मेलनमा यसबारे घनिभूत छलफल गर्न सुझाव दिए ।
समाजसेवी एवं नेपाली कांग्रेसका नेता ध्रुव देवले महासम्मेलन सफल पार्न आवस्यक सहयोग गर्ने प्रतिबद्धता जनाए ।
नेपाल पत्रकार महासंघ, सप्तरीका अध्यक्ष श्रवण कुमार देवले स्वजातीयकाे उत्थानका लागि महासम्मेलनमा याेजना लग्न सुझाव दिए ।
उक्त अवसरमा देव जातीका कानुन व्यवसायी, राजनीतिक दलका नेता र संचारकर्मीहरुले महासम्मेलनबारे बोलेका थिए ।
वागेश्वरी सेवा समितिका अध्यक्ष इन्जिनियर इन्द्रनारायण देवको अध्यक्षतामा कार्यक्रमको आयोजना गरिएको थियो ।
वागेश्वरी सेवा समिति, भवानी सेवा समिति, विराट देव सेवा समिति, देव सेवा समितिको आयोजनामा देव अन्तर्राष्ट्रिय महासम्मेलनको आयोजना गरिदैछ ।
