राजविराज । सप्तरीमा एक महिलाको शंकास्पद मृत्यु भएको छ । हत्या आशंकमा प्रहरीले महिलाका पति र ससुरालाई नियन्त्रणमा लिएको छ ।
दुई महिनाअघि मात्रै विवाह गरेकी डाक्नेश्वरी नगरपालिका माइती र महादेवा गाउँपालिका घर भएकी महिलाको शंकास्दपद मृत्यु भएको पाइएको छ ।
महादेवा गाउँपालिका वडा नम्बर १ सोनरा टोल बस्ने दीपक यादवकी पत्नी २१ बर्षीया दीपाको शनिबार मृत्यु भएको छ । बिरामी भएको भन्दै पति दीपक र ससुरा पर्शुरामले शनिबार दीपालाई उपचारका लागि गजेन्द्रनारायण सिंह अस्पताल ल्याएका थिए । तर, अस्पताल पु¥याए लगत्तै चिकित्सकले उनलाई मृत फेला पारेका थिए ।
मृतक दीपाको शरीरमा चोटपटक र निलडाम देखिएको प्रहरीले जनाएको छ । घट्ना शंकास्पद देखिएको भन्दै अनुसन्धान अगाडि बढाइएको सप्तरी प्रहरीका प्रवक्ता एवं डीएसपी जितेन्द्र कुमार बस्नेतले बताए । ‘घाँटीमा निलडगाम देखिएको छ, त्यहीं भएर हामीले अनुसन्धान अघि बढाएका छौं’ उनले भने ।
उनका अनुसार मृतकको शव पोष्टमार्टमका लागि विपि कोईराला स्वास्थ्य विज्ञान प्रतिष्ठान धरान पठाइएको छ ।
घटनाको अनुसन्धानका लागि मृतक दिपाकी पति दीपक र ससुरा पर्शुरामलाई नियन्त्रणमा लिइएको प्रबक्ता बस्नेतले बताए ।
माइती पक्षले दीपाको हत्या गरेको भन्दै प्रहरीमा जाहेरी दिएका छन् ।
गत ४ असारमा दीपा र दीपकको सामाजिक परम्परा अनुसार बिवाह भएको थियो । तर विवाह पछि थप दाइजो माग्दै दीपक, पर्शुरामसहितकाले दीपालाई दिनहुँजसो यातना दिदैं आएको मृतकका काका भगवती प्रसादले बताए ।
झण्डै रु २५ लाख खर्च गरेर छोरीको विवाह गरेको उनले बताए । उद्यपी थप दाइजो माग्दै आफ्नी छोरीलाई दिनहुँ कुटपिट र गालीगलौज गर्दै आएको उनले बताए ।
दाईजोकै बिषयमा निरन्तर विवाद हुँदै आएको र सोही विवादकै कारण दीपाको उनका पति र ससुराले कुटपिट गरी हत्या गरेको माइती पक्षको भनाई छ ।
‘दीपा साँच्चिकै बिरामी थियो भने हामीलाई किन खबर गरिएन् ?’ मृतकका काका भगवतीले भने, ‘दोषीमाथि कार्वाही होस् र आफूहरुलाई न्याय मिलोस् ।’
