राजविराज । शिक्षक महासंघ, सप्तरीले सरकारसँग भएको सहमति अनुसार शिक्षा विधेयकलाई अगाडि बढाउन माग गर्दै आईतबार जिल्ला शिक्षा विकास तथा समन्वय इकाईमा धर्ना दिएको छ ।
महासंघको अगुवाईमा शिक्षकहरुले दिउँसो १ बजेदेखि ३ बजेसम्म दुई घण्टा इकाईमा धर्ना दिएका हुन् ।
गत २०८१ चैत २० गतेदेखि एक महिनासम्म भएको आन्दोलनपछि सरकारसँग २०८२ बैशाख १७ गते ९ बुँदे सहमति भएको थियो । तर, सहमति अनुसार शिक्षा विधेयकलाई अगाडि नबढाएको महासंघले जनाएको छ ।
सहमति अनुसार अस्थायी प्रकृतिका शिक्षकको स्थायित्वका लागि तोकिएको आन्तरिक परीक्षाको ७५ प्रतिशत नभएको, गोल्डेन हेन्डसेक अन्तर्गत दिइने रकम किटान नभएको, स्थायी शिक्षकको आवधिक बढुवाको प्रबन्ध नभएको, निबृत्तिभमरण प्रयोजनका लागि सम्पूर्ण अस्थायी अवधीको गणना नभएको, म्याद सकिएका अध्यापन अनुमति पत्रको म्याद थप्नेजस्ता बिषय नसमेटिएको महासंघले जनाएको छ ।
सम्बोधन हुन छुटेका सबै बिषयहरु सहमति अनुसार सम्बोधन गर्न महासंघले माग गरेको छ ।
