राजविराज । करदाता सेवा कार्यालय राजविराजमा यथावत राख्न सप्तरीका सरोकारबालाले माग गरेका छन् ।
आइतबार प्रधानमन्त्री सुशीला कार्कीलाई ज्ञापन पठाउँदै उनीहरूले यस्तो माग गरेका हुन् ।
जिल्लास्थित राजनीतिक दलका प्रतिनिधि, पालिका प्रमुख, उद्योगी, व्यवसायीसहितका सरोकारवालाले संयुक्त रूपमा प्रमुख जिल्ला अधिकारी मार्फत प्रधानमन्त्रीलाई ज्ञापन पठाएका हुन् ।
नेपाल सरकार मन्त्रिपरिषदको १७ कात्तिकको निर्णयानुसार यस जिल्लामा स्थापित करदाता सेवा कार्यालयलाई अन्यत्र सार्ने निर्णय भएको कुरा विभिन्न संचार माध्यमवाट थाहा हुन आएकोमा गम्भीर ध्यानाकर्षण भएको जनाइएको छ ।
‘नेपाल सरकारको नीति अनुसार यो ठाउँले आन्तरिक राजश्व कार्यालय पाउनु पर्ने आफूहरूकाे माग रहि आएकोमा रहेको करदाता सेवा कार्यालय समेत सार्ने कुरावाट हामी माथी कुठाराघात भएको महसुस गरेका छौं’ ज्ञापनपत्रमा भनिएको छ, ‘तसर्थ हामी सप्तरीका करदाताहरुको पिरमार्कालाई बुझी र यस क्षेत्रको राजश्व असुलीलाई समेत मध्यनजर गरी हामीले पाई आएको सेवा सुविधावाट बन्चीत नगरि करदाता सेवा कार्यालय, राजविराजलाई यथावत राखी सोही कार्यालयवाट निरन्तर सेवा प्रवाहको व्यवस्था कायम राख्न यो ज्ञापन पत्र सम्माननीय प्रधानमन्त्री समक्ष प्रस्तुत गरेकाछौं ।’ माग पुरा नभएको अवस्थामा यस जिल्लास्थित सम्पूर्ण राजनितिक दल, पालिकाहरु, उद्योग वाणिज्य संघ, निर्माण व्यवसायी संघ, नेपाल पत्रकार महासंघ, सप्तरी, शाखा लगायत सम्पूर्ण सरोकारवालाहरु मिलि चरणबद्ध रुपमा कडा भन्दा कडा आन्दोलन गर्न वाध्य हुने चेतावनी दिइएको छ ।
