राजविराज । सप्तरीमा बाढी पूर्व सूचना प्रणाली जडान गर्दा जनधनको क्षतिमा उल्लेख्नीय कमी आएको राजविराजमा आयोजित एक कार्यक्रममा जानकारी गराइएको छ ।
दुई दशकदेखि सामाजिक क्षेत्रमा कृयाशिल सबल नेपालले बुधबार आयोजना गरेको सामाजिक लेखा परीक्षणमा यो जानकारी दिइएको हो ।
कार्यक्रममा सबल नेपालका कार्यकारी निर्देशक दिपक झाले सप्तरीको पूर्व पश्चिम राजमार्ग अन्तर्गत रुपनी गाउँपालिकास्थित खाँडो खोलामा बाढी पूर्व सूचना प्रणाली जडान गरिएको जानकारी दिए ।
इसिमोडसँगको सहकार्यमा प्रणाली जडान गरिएपछि लक्षित क्षेत्रमा सम्भावित बाढीबाट हुने जनधनको क्षतिमा कमी आएको उनले बताए ।
यस प्रणालीबाट भारतको बिहार राज्य अन्तर्गत सितामढी, सुपौल र मधुवनी जिल्लाका बाढी प्रभावित क्षेत्रमा समेत पूर्व सूचना प्रवाह भई जनधनको क्षति न्यूनिकरण गरेको उनको भनाई छ ।
कार्यक्रममा झाले हाल संस्थामा बीएमजेड र भिभाकोनको सहयोग तथा वेल्थभरहन्गर हिल्फेसँगको साझेदारीमा सिरहा जिल्लाको सिरहा, कर्जन्हा, गोलबजार , कल्याणपुर नगरपालिका तथा बिष्णुपुर गाउँपालिकामा स्वास्थ्य, सरसफाई र सुरक्षित खानेपानीमा सहज पहुँच सुनिश्चित सम्बन्धी कार्यक्रम संचालनमा रहेको बताए ।
सोही परियोजना अन्तर्गत कर्जन्हा नगरपालिका १ बाल्टियाका ६१९ घरधुरी र गोलबजार नपा १ र ४ का घरधुरीका लागि ओभरहेड टयांक निर्माण गरी ६७९ घरधुरीमा सुरक्षित खानेपानी पहुँच वृद्धि गरी नगरपालिकाकालाई हस्तान्तरण गरिएको जानकारी दिइयो ।
यस्तै, सेभ द सप्तरीसँगको साझेदारीमा संस्थागत विकास, रणनीतिक साझेदारी तथा क्षमता अभिवृद्धि केन्द्रीत परियोजना निरन्तर संचालनमा रहेको, सेभ द चिल्ड्रेनकै साझेदारीमा सन् २०१४ देखि सप्तरीको सुरुङा र खडक नगरपालिकामा समुन्नती कार्यक्रम संचालन हुँदै आएको जानकारी दिइयो ।
सबल नेपालका आयुष श्रेष्ठको अध्यक्षतामा भएको कार्यक्रमका प्रमुख अतिथी जिल्ला समन्वय समितिका प्रमुख शिबनारायण साहले सामाजिक लेखा परीक्षण गर्नु सबै संस्थाको दायित्व भएको बताए ।
कार्यक्रममा सिरहाको गोलबजार नगरपालिकाका उप प्रमुख मान्ती साह, नेपाल पत्रकार महासंघ, सप्तरीका अध्यक्ष श्रवणकुमार देवसहितकाले मन्तव्य व्यक्त गर्दै सबल नेपालले गरेको गतिविधीको प्रशंसा गरेका थिए ।
