राजविराज । जनअधिकार पार्टीले लालपूर्जा माग्दै राजजविराजमा शुरु भएको आन्दोलनप्रति ऐक्यबद्धता जनाएको छ ।
राजविराज स्थापना भएकै बेलादेखि बसोबास गर्दै आएकालाई अबिलम्ब लालपुर्जा उपलब्ध गराउन पार्टीले माग गरेको छ । पार्टी अध्यक्ष शरदसिंह यादवले बर्षौदेखि बसोबास गर्दै आएकाहरुलाई अबिलम्ब लालपुर्जा उपलब्ध गराउन सरकारसँग माग गरे ।
‘लालपूर्जा उपलब्ध गराउन बिटौरी र ब्लक जग्गाधनीले शुरु गरेको आन्दोलनप्रति पार्टीको ऐक्यबद्धता छ’ अध्यक्ष यादवले एक भिडियो मार्फत् भनेका छन्, ‘बर्षौदेखि बसोबास गर्दै आएपनि लालपुर्जा नदिइनु दुःखद हो ।’
राजविराज स्थापना हुने बेला ७० बिघा जग्गामा पाँच हजार परिवारलाई बसाइएको र ती जग्गाधनीहरुले नगरपालिकालाई कर समेत तिर्दै आएको उनको भनाई छ । कर तिर्दै विगतमा बैंकबाट ऋण समेत पाउँदै आएपनि पछिल्लो समयमा बैंकहरुले ऋण दिन नमान्दा यहाँका बासिन्दा पीडित बनेको अध्यक्ष यादवले बताए ।
उनले आन्दोलनलाई सम्बोधन गर्दै लालपुर्जा उपलब्ध गराउन संघीय सरकारसँग आग्रह गरेका छन् ।
राजविराजका बिटौरी र ब्लक जग्गाधनी लालपुर्जाको माग राख्दै पछिल्लो एक बर्षभन्दा बढी समयदेखि आन्दोलित छन् । उनीहरुले संघर्ष समिति बनाएर सोमबार राजविराज नगरपालिकाको कार्यालयमा तालाबन्दी गरी धर्ना दिन शुरु गरेका छन् ।
