राजविराज । सप्तरी प्रहरीले नियन्त्रणमा लिएको एक क्वीन्टलभन्दा बढी लागूऔषध गाँजा नष्ट गरेको छ ।
राजविराज नगरपालिका वडा नम्बर १५ स्थित खाँडो खोलामा मंगलबार गाँजा नष्ट गरिएको हो । गाँजालाई आगो लगाएर नष्ट गरिएको प्रहरीले जनाएको छ ।
प्रहरीको टोलीले ३१ बैशाखमा खडक नगरपालिका ५ स्थित पूर्व पश्चिम राजमार्गबाट १४१ किलो गाँजासहित दुई जनालाई नियन्त्रणमा लिएको थियो ।
इलाका प्रहरी कार्यालय कल्याणपुर र प्रहरी चौकी विसनपुरबाट खटिएको प्रहरीले धरानबाट लहानतर्फ जाँदै गरेको को. १ च २६६७ नम्बरको पिकअप भ्यानलाई जाँच गर्ने क्रममा फल्स बटम बनाई लुकाई छिपाई राखेको १४ वटा पोकामा रहेको उक्त परिमाणको गाँजा फेला पारी दुई जनालाई पक्राउ गरेको थियो ।
धनकुटा साँगुरीगढी गाउँपालिका–१ बस्ने ३१ बर्षीय महाप्रसाद लिम्बु र मोरङ लेटाङ नगरपालिका–५ बस्ने ४७ वर्षीय बल बहादुर लिम्बु पक्राउ परेका थिए ।
सोही गाँजा आगो लगाएर नष्ट गरिएको जिल्ला प्रहरी कार्यालय, राजविराजले जनाएको छ ।
