राजविराज । राजविराज बजारका बासिन्दाहरुले यथासिघ्र लालपुर्जा नदिइए चरणबद्ध रुपमा थप सशक्त आन्दोलन गर्न बाध्य हुने चेतावनी दिएका छन् ।
प्रधानमन्त्री, भूमि व्यवस्था, सहकारी, संघीय मामिला तथा सामान्य प्रशासन मन्त्री, नापी विभाग, प्रतिनिधी सभा तथा प्रदेश सभाका सदस्यसहितका सरोकारबालालाई बोधार्थ राखेर मंगलबार प्रमुख जिल्ला अधिकारीलाई ज्ञापन बुझाउँदै उनीहरुले आन्दोलनको चेतावनी दिएका हुन् ।
लालपुर्जा पाउनुपर्ने एकसुत्रीय माग राख्दै उनीहरुले संघर्ष समिति बनाएको छ । संघर्ष समितिकै अगुवाईमा यसअघि लालपुर्जा पाउनुपर्ने माग राखेर राजविराज नगरपालिकामा धर्ना दिदैं तालाबन्दी गरेका उनीहरुले थप सशक्त आन्दोलनको चेतावनी दिएका हुन् । ‘आन्दोलनबाट उत्पन्न हुन सक्ने कुनै पनि अवस्था तथा परिणामको सम्पूर्ण जिम्मेवारी सम्बन्धित निकाय स्वयंले बहन गर्नुपर्नेछ’ ज्ञापनमा भनिएको छ, ‘जनताको संवेदनशिल र दीर्घकालिन समस्यालाई गम्भीरतापूर्वक लिई तत्काल आवश्यक पहल गरिदिन हुन अनुरोध गर्दछौं ।’
राजविराज नगरपालिकाभित्र लालपुर्जाबिहीन रहेका पाँच हजार भन्दा बढी परिवारलाई तत्काल कानुनी प्रकृया पूरा गरी लालपुर्जा वितरण गर्नुपर्ने उनीहरुको माग छ । उनीहरुले विगतमा नगरपालिकाको रसीद तथा स्वामित्वको आधारमा बैंक तथा वित्तिय संस्थाबाट प्राप्त हुँदै आएको कर्जा तथा अन्य सेवा सुविधा पुनः संचालन गर्न आवश्यक प्रमाण उपलब्ध गराउन पनि माग गरेका छन् ।
